Deeltitel

Ek het vanmiddag ‘n konsultasie gehad met 2 nuwe kliënte wat my kom sien het.  Of hulle na hierdie konsultasie nog kliënte gaan wees sal ons maar moet sien.  Leer hier oor hoekom ek so sê.

Die feite is min of meer as volg.  Die persone is op die bestuur van die beheerliggaam.  Dit is ‘n klein kompleks met 5 eenhede.  Een van die eenhede se eienaars het ‘n besigheid binne in sy eenheid begin.  Dit klink of hy dit in die garage bedryf, maar hy hou die deur die heeltyd toe, so dit is moeilik om presies te sê bedryf hy dit in sy garage of bedryf hy dit in sy sitkamer, nie dat dit myns insiens ‘n verskil maak nie.

Wat wel die probleem is, is dat hy nie meer sy voertuie in die garage parkeer nie.  Sy voertuie staan nou buite op besoekersparkering.  Hy het twee of drie personeelhede en/of vennote wat elke dag die kompleks binne kom, en heeldag hulle voetuie daar parkeer.  Die besigheid veroorsaak nie per sé ‘n probleem nie aangesien die werknemers/vennote in die gebou in verdwyn en hulle geen kliënte daar ontvang nie.

Die frustrasie en probleem vir die kliënt is dat die besoekersparkering opgebruik word, en omdat daar nou meer mense in en uit beweeg dit ‘n sekuriteitsrisiko veroorsaak.  Die spesiefieke deeltitelkompleks se reëls klink my verbied besigheid tensy daar toestemming is en dan is dit ook beperk tot seker soorte besighede.  Die deeltitelwet handel uit die aard van die saak ook met die situasie maar ek moet dit nog gaan oplees voordat ek presies weet wat dit voorskryf.

Die grondwet maak voorsiening dat elke burger geregtig is om ‘n besigheid te bedryf binne die grense van die republiek van Suid-Afrika onderhewig aan sekere beperkinge.  Ek is tans besig met navorsing om behoorlike advies aan die kliënte te gee aangesien dit nie die soort van sake is wat ek elke dag doen nie.

Terwyl ek konsulteer dink ek egter aan die morele aspek van die situasie.  Ons het hier iemand wat ‘n besigheid wil bedryf, wat heel moontlik werk skep aan ander en dit moontlik nie koste effektief is om ‘n besigheidperseel te huur nie.  Dit is vir hom ook verder moontlik om die besigheid van sy huis af te bedryf omdat die aard van die besigheid dit toelaat, maar dit is nou tot ergenis van die ander eienaars in die kompleks.

Ek sal graag wou hoor, wat is jou opinie en wie se regte moet voorkeur geniet.  Ek vra dit nie uit ‘n regsoogpunt nie, dit moet ek nog vir my kliënt doen.  Ek vra uit ‘n morele oogpunt.